Diario Marín
A Deputación de Pontevedra vén de convocar as axudas para a formación de mulleres en postos técnicos deportivos na provincia, incluíndo xuízas e árbitras. Até o momento, esta liña de apoio, destinada a aumentar a presenza feminina en todas as disciplinas e ámbitos deportivos, tanto en equipos de base como de elite, financiaba exclusivamente os estudos das adestradoras e técnicas.
Como novidade, a institución provincial cubrirá agora o 100% da matrícula, ata un máximo de 600 euros (+20% respecto a 2022). As mulleres interesadas en beneficiarse desta iniciativa, dotada con 25.000 euros, terán de prazo ata o 30 de novembro e, desde este mércores, 27 de setembro, poderán solicitalas preferentemente a través da sede electrónica da Deputación. A convocatoria sufragará os gastos de matrícula dos títulos oficiais que dan acceso aos postos de adestradora, técnica, xuíza ou árbitra nas diferentes modalidades.
Federacions deportivas
Os estudos deberán ser impartidos polas federacións deportivas autonómicas ou estatais ou en centros de ensino deportivo de réxime especial, comezando en 2023 e finalizando neste ano ou incluíndo o ano lectivo 2023/2024. Para poder acceder ás axudas, as interesadas deberán ser nadas na provincia ou residir desde o 1 de xaneiro do presente ano.
Na actualidade, só o 10% dos postos técnicos ou profesionais relacionados co deporte son ocupados por mulleres. A través destas axudas aos estudos, a Deputación busca que máis mulleres poidan alcanzar altos cargos de decisión en organizacións deportivas.
