Diario Marín
A Asociación para a Recuperación da Memoria Histórica de Marín está a organizar o evento anual no Pozo da Revolta, en Bagüín, que terá lugar hoxe domingo, 24 de setembro, ás 13:00 h.
Neste evento, renderase homenaxe ás mulleres e homes que loitaron pola liberdade durante o golpe de estado do 36 e a represión franquista posterior. O evento contará coas intervencións de Enriqueta Otero e Carlos Villegas, membros da asociación, así como do profesor, escritor e investigador Xosé Álvarez Castro, e tamén haberá unha actuación musical de Botallecurri.
Dentro das actividades deste mes de setembro, o martes 26 proxectarase o documental «Acordamos» na Casa da Cultura de Seixo ás 20:00 horas. Este documental, unha idea orixinal do Departamento de Memoria Histórica da Deputación de Pontevedra, pretende transmitir unha mensaxe de paz, memoria e rebeldía ás novas xeracións.
A dirección artística é de Uxía, a dirección técnica e realización de Lucas Terceiro, e o guión e a presentación son de Carmen Conde, coa colaboración de Montse Fajardo como asesora de contidos.
No documental, ademais das voces das testemuñas dos acontecementos, tamén participan intérpretes e grupos musicais das localidades e lugares que foron protagonistas das loitas no inicio do século XX, como os avances no agrarismo en Sobredo, os sindicatos mariñeiros en Moaña, a loita veciñal contra os abusos caciquís en Lérez, a loita política na Illa de Arousa, a batalla do profesorado por un ensino libre en Tomiño e a resistencia e a guerrilla en Vilagarcía.
