O presidente da Deputación de Pontevedra, Luis López, avanzou onte a campaña turística de 2024 que Turismo Rías Baixas presentará o próximo mércores 24, ás 12:30 horas, na Feira Internacional de Turismo (Fitur) e que levará por lema “100 % Rías Baixas”. “Na Deputación quixemos ser os mellores aliados do sector cunha campaña rompedora, desenfadada e enérxica orientada a un dos nosos mellores atractivos: a auga. Nun intre no que este recurso está no centro do debate, a nosa abundancia ten que ser unha vantaxe. Á auga debémoslle multitude de experiencias que fan que os que nos visitan vivan experiencias 100 % Rías Baixas”, afirmou o presidente da Deputación.
As Rías Baixas están entre os cinco destinos nomeados por Viajes National Geographic para ser elixido mellor destino gastronómico de España. A sostibilidade do destino foi outro dos aspectos que quixo destacar Luis López. “Hai moito tempo que o noso destino traballa nesa dirección; mesmo antes de popularizarse o termo sostible, As Rías Baixas xa o era. Por iso, sementar dúbidas sobre a calidade dos produtos do mar, sobre a excelencia das nosas costas ou sobre sectores que empregan milleiros de persoas é de todo menos responsable. O noso destino é de todos, como de todos é o deber de velar pola súa boa imaxe”, defendeu.
Número de visitantes máis alto desde 2010
Tamén puxo en valor o traballo realizado polas e polos profesionais do sector turístico ao longo dos últimos anos e o seu compromiso por potenciar aínda máis o destino. “Vexo un sector que traballa coma se o impresionante 2023 fose só un paso previo cara a un 2024 aínda mellor”, recoñeceu López, quen lle agradeceu a todo o sector por “dar o 100 % e facer que sexamos admirados e envexados en todo o mundo”.
Foi o bo traballo do sector turístico e das institucións o que logrou que o ano que acaba de rematar fose histórico, cun mes de agosto que bateu récords de ocupación, co camiño portugués pola costa medrando un 72 %, coas visitas aos castelos de Soutomaior e Sobroso rachando teitos ou cun Museo de Pontevedra rexistrando o número de visitantes máis alto desde 2010. “O turismo vai a máis e o seu empuxe fai que todos medremos con el”, exclamou o presidente da Deputación.
