Diario Marín
As rutas ornitolóxicas da Deputación de Pontevedra para o ano 2024 comezarán hoxe domingo, 14 de xaneiro, cun percorrido pola Foz da Ramallosa e a praia América, nos concellos de Nigrán e Baiona. A primeira saída do programa, que é realizado en colaboración con SEO/BirdLife, encheu as 25 prazas dispoñibles en menos de 24 horas.
A Foz da Ramallosa é un espazo intermareal protexido pola Rede Natura 2000, destacándose polo seu alto valor ecolóxico e sendo propicio para a observación de aves pola súa proximidade e a confianza que as aves mostran cara ao ser humano.
Mazaricos, biluricos, pilros, gaviotas, garzas, águias
Durante a ruta ornitolóxica, os participantes terán a oportunidade de avistar diversas especies, desde limícolas como mazaricos, biluricos ou pilros, ata unha ampla variedade de gaivotas, así como diferentes especies de garzas, águias pescadoras e aves mariñas como os carráns cristados.
O percorrido, guiado por dúas guías de ornitoloxía de SEO/BirdLife, inclúe transporte en autobús tanto para o desprazamento como para a visita á zona na que ten lugar a actividade, recomendándose levar roupa cómoda e calzado apropiado. Cada participante terá á súa disposición prismáticos para observar aves e dous telescopios terrestres de alta gama para poder gozar das aves sen molestalas. Ademais, entregaráselle unha guía de aves.
Voando nas Rías Baixas
O programa «Voando nas Rías Baixas» para o 2024 contempla, ademais deste percorrido pola Foz da Ramallosa e a praia América, outras seis rutas ornitolóxicas por diferentes espazos da provincia con alto valor ecolóxico ou protexidos pola Rede Natura 2000.
- En febreiro terá lugar un percorrido polo estuario do río Lérez e a zona intermareal Combarro-Lourido (Pontevedra e Poio):
- En abril polas Ribeiras do río Umia (Ribadumia e Cambados);
- En maio pola Serra do Suído (A Lama, Fornelos de Montes e Covelo):
- En xuño pola praia da Lanzada (O Grove):
- En setembro polas lagoas de Rouxique (Sanxenxo);
- En novembro polo estuario do río Miño (A Guarda).
