A Asociación Cultural Almuinha comeza o luns 6 de outubro o seu programa de actividades. Os luns estarán dedicados á pandeireta e ao canto da man da profesora Erica Iglesias Neira.
Haberá dous niveis: iniciación, de 17:00 a 18:00 horas, e perfeccionamento, de 18:00 a 19:00 horas. Trátase dunha oportunidade para achegarse ao rico patrimonio musical galego, aprender o manexo da pandeireta e perfeccionar técnicas vocais ligadas á tradición.
Pola súa parte, os mércores reservaranse para o baile tradicional, con clases impartidas polo profesor Álvaro Carballo en horario de 20:00 a 21:00 horas. A inscrición e máis información poden solicitarse a través do correo a.c.almuinha@gmail.com ou nos teléfonos 698136733 e 636584161.
Venres de «Noites crepusculares»
En paralelo, o espazo Céltica inicia unha nova actividade denominada “Noite Crepuscular”, que terá lugar os venres entre as 20:00 e as 22:00 horas. Nesta proposta combínanse distintas expresións artísticas e alternativas: recitado, pintura, debuxo, debate, poesía, tarot, música ambiente e un espazo para compartir néctar e ambrosía.
A iniciativa busca crear un ambiente máxico no que a arte e a espiritualidade teñan un punto de encontro, acompañadas por música celta que servirá de fío condutor. Non se trata dunha actividade pechada nin cun calendario ríxido, senón dun espazo aberto á participación espontánea, pensado para todas aquelas persoas que queiran compartir a súa creatividade e curiosidade.
Un outono que convida a aprender
Con esta programación, Marín consolídase como un referente no eido cultural, ofrecendo alternativas que van desde a aprendizaxe das tradicións galegas ata a exploración doutros camiños artísticos máis libres.
Tanto Almuinha como Céltica convidan á veciñanza a participar, aprender, gozar e contribuír a que a vila siga a ser un lugar vivo e dinámico, no que a cultura sexa un piar fundamental da vida comunitaria.
Outubro, así, preséntase como o punto de partida dun curso cheo de música, danza, poesía e encontros especiais que prometen enriquecer as noites marinenses.
