O Museo do Mar de Marín anunciou o peche do prazo de inscrición para o III Festival Cine do Mar, que terá lugar en Marín entre o 20 e o 26 de abril. Unha vez superada a data límite do 15 de marzo, a organización amosa a súa satisfacción pola elevada participación acadada, que supera os 300 filmes procedentes de distintos puntos do mundo.
Segundo destacan desde o festival, esta cifra confirma a consolidación do seu carácter internacional. Entre as obras recibidas hai unha importante presenza de producións españolas e de países iberoamericanos, especialmente de Brasil e Portugal, así como unha notable representación europea e algunhas propostas chegadas desde Asia.
Rocio Cibes, jurado.
Aposta polo audiovisual galego
Un dos aspectos máis salientables desta edición é o compromiso co talento local. Aproximadamente un 5% das obras inscritas son de produción galega, unha porcentaxe que, segundo a organización, terá unha visibilidade destacada durante o festival. O obxectivo é claro: apoiar e divulgar o sector audiovisual galego dentro dun contexto internacional.
Programación e principais fitos
A organización tamén adiantou algúns dos momentos máis relevantes desta edición. A inauguración celebrarase no Auditorio de Marín coa proxección do filme Rondallas e a entrega do premio honorífico Luz de Faro ao actor Carlos Blanco.
A clausura estará marcada pola proxección de San Simón, que dará paso a unha das actividades máis especiais do festival: unha visita á Illa de San Simón o domingo 26 de abril, pechando así a programación.
Novidades e actividades paralelas
O festival manterá propostas que xa tiveron éxito en edicións anteriores, como o showcooking a cargo do chef Marcos S. Area, do Restaurante É. Ademais, como novidade, incorporarase unha xornada dedicada ao público escolar, coa participación de centros educativos de Marín e da súa contorna.
Nesta actividade haberá proxeccións adaptadas e un contacontos organizado por Barafunda Animación, reforzando así a dimensión educativa e social do festival.
Con esta programación variada, o Festival Cine do Mar continúa medrando e afianzándose como unha cita cultural de referencia en Galicia.
