O concelleiro de Facenda, Manuel Santos, lembrou esta mañá que desde comezos de ano permanece aberto o prazo para solicitar a bonificación do 40 % no Imposto sobre Bens Inmobles (IBI) destinada ás familias numerosas, unha medida habilitada polo Concello de Marín a través do departamento de Tesourería.
Esta bonificación, que se aplica sobre a cota íntegra do imposto, forma parte da política fiscal do Goberno local desde o ano 2020. Segundo destacou Santos, trátase dunha medida “esencial para apoiar ás familias de Marín que máis o precisan, tendo en conta os elevados gastos que asumen, especialmente nun contexto económico tan delicado como o actual”.
Durante o ano 2025 tramitáronse un total de 118 solicitudes, o que supón 36 máis ca no exercicio anterior, un incremento que desde o Concello se interpreta como reflexo da utilidade desta medida de apoio fiscal.
Ata o 30 de abril
As familias interesadas poden solicitar a bonificación ata o 30 de abril, achegando o título acreditativo de familia numerosa vixente no exercicio actual, así como a referencia do inmoble sobre o que se aplicará a redución do 40 % no pagamento do IBI. A documentación pode presentarse tanto a través do Rexistro do Concello como da sede electrónica municipal.
