O encontro contará coa participación de catro voces de referencia: Vanesa López (Trisquelia Comunicación), Pablo Méndez (Pablo Méndez Performances), Andrés Lamosa (PlayPlan) e Víctor Antón (Gaias Eventos). Todas e todos eles achegarán a súa traxectoria profesional e visión estratéxica dun ámbito que non deixa de medrar e diversificarse.
Ao longo da sesión analizaranse as múltiples facetas dos eventos contemporáneos: desde festivais, celebracións e propostas culturais que mobilizan miles de persoas, ata feiras sectoriais, congresos e encontros corporativos que reforzan a proxección económica e empresarial das cidades.
Un espazo aberto á comunidade educativa
A actividade coordinada pola profesora Ana Limeses, está dirixida ao alumnado dos distintos ciclos de Formación Profesional do IES Luís Seoane, que terá a oportunidade de interaccionar cos poñentes e coñecer de primeira man os retos actuais do sector. Ademais, o acto poderá seguirse en directo por streaming a través da canle oficial de YouTube do centro, abrindo a participación ao conxunto da comunidade educativa e ao público interesado da man do realizador José Aragunde.
A retransmisión telemática será posible grazas ao labor do técnico de streaming Jose Aragunde e do seu equipo, encargados da realización e difusión do evento.
Colaboración co entorno e aprendizaxe práctica
A mesa redonda conta tamén coa colaboración da empresa local de mobiliario e decoración Qka, que cederá o equipamento necesario para a ambientación do escenario, reforzando a conexión do centro co tecido empresarial da contorna.
Esta actividade enmárcase na liña estratéxica do IES Luís Seoane de promover accións formativas vinculadas á realidade profesional, favorecendo a aprendizaxe baseada na experiencia directa e o contacto con especialistas. «Cidades en movemento» preséntase así como unha oportunidade para poñer en valor o papel dos eventos na transformación urbana e para inspirar ás futuras xeracións de profesionais do sector.
