O Concello de Marín volverá poñer en marcha a campaña de sorteo de tarxetas regalo polo Día da Nai, dirixida a premiar á clientela que aposta polo comercio local nas compras previas a esta celebración.
A iniciativa, que xa tivo boa acollida en edicións anteriores, busca incentivar o consumo na vila e recompensar ás persoas consumidoras cun agasallo que só pode gastarse en establecementos comerciais e hostaleiros de Marín, reforzando así a economía local.
Marín en rede
Desde a Administración local destacan a boa acollida destas campañas, tanto por parte dos comercios como da cidadanía, ao fomentar as compras de proximidade e garantir que o investimento quede no tecido económico do municipio. As bases de participación daranse a coñecer máis adiante, a medida que se achegue a data de inicio da campaña.
No marco da promoción do comercio local, a plataforma Marín en Rede incorporou no último trimestre oito novos negocios: a Panadería A Bicha, recentemente aberta na Praza de Abastos; a Administración de Lotería de Jaime Janer; a Libraría Begoña de Seixo; La Semilla; Leti Ferreira; Umami; Los Manjares de Conchita e Electrodomésticos Ogando. Todos eles contan xa cunha ficha propia na web municipal, mellorando a súa visibilidade en internet.
Marketing dixital
Un dos eixos principais do traballo da plataforma é o posicionamento SEO, facilitando que os negocios locais aparezan entre os primeiros resultados nas buscas en liña sobre comercios en Marín, con información actualizada sobre horarios, produtos, servizos, prezos e imaxes.
Desde o Concello subliñan a importancia da presenza dixital na actualidade e lembran que este servizo é totalmente gratuíto para os establecementos, actuando como unha auténtica axencia de márketing dixital ao servizo da economía local. Entre as accións con maior impacto destacan os vídeos promocionais, que nos últimos meses acadaron miles de visualizacións nas redes sociais, reforzando a conexión dos comercios coa comunidade.
