O obxectivo do seminario é poñer en valor a economía social como alternativa viable e sostible no ámbito do marisqueo, un sector que afronta importantes desafíos vinculados ao relevo xeracional, a igualdade, a sostibilidade ambiental e o emprendemento. A iniciativa pretende ademais dar visibilidade ao papel protagonista das mulleres, maioritarias no marisqueo a pé, e fomentar a súa participación activa na toma de decisións e na innovación.
A programación arrancará ás 16:30 coa apertura institucional a cargo de Cristina Caramés, presidenta de ADEC, e da conselleira do Mar, Marta Villaverde Acuña. A continuación, intervirán expertos e representantes de organizacións vinculadas ao marisqueo e á economía social. Entre eles figuran Gonzalo Rodríguez Rodríguez, profesor da Universidade de Santiago de Compostela, Pilar Otero González, presidenta de ANMUPESCA, o técnico da Confraría de Pescadores de Sanlúcar de Barrameda, José Carlos Macías, e a mariscadora e xestora de AmarCarril, Rita Vidal Mouriño.
O futuro das confrarías a debate
Durante as ponencias abordaranse cuestións como o futuro das confrarías, as posibilidades de emprendemento colectivo, a formación como ferramenta de profesionalización, a xestión sostible dos recursos e os retos de innovación para un sector que busca adaptarse ás novas demandas sociais e ambientais. O encontro culminará cun coloquio aberto ao público ás 19:30 horas, seguido da clausura oficial prevista para as 20:30.
A participación no seminario é gratuíta, mais é preciso inscribirse previamente. As persoas interesadas poden elixir entre a modalidade presencial en Pontevedra ou a asistencia virtual, ben en directo ou a través da gravación dispoñible en diferido, co fin de facilitar o acceso ao maior número posible de participantes.
Un espazo de aprendizaxe compartida
Entre as entidades colaboradoras destacan a Federación de Confrarías de Pontevedra, a Universidade de Santiago de Compostela, ANMUPESCA, AmarCarril, UNED Pontevedra, a Rede Eusumo e a Consellería do Mar. Todas elas suman esforzos para facer deste encontro un espazo de aprendizaxe compartida e de construción colectiva de propostas.
O Seminario Nacional sobre Economía Social no Marisqueo constitúe así unha oportunidade para repensar o sector desde unha perspectiva innovadora, inclusiva e sostible, reforzando a economía social como motor de desenvolvemento local e de cohesión comunitaria.
