Álvaro Gago (Vigo, 1986) concluíu expresando o seu desexo de regresar á vila unha vez rematada a súa próxima longametraxe, Porto Alegre, actualmente en fase de desenvolvemento e financiamento e con previsión de rodaxe para o verán de 2027.
O cineasta reivindicou en Marín o papel das mulleres cineastas, historicamente relegadas a un segundo plano dentro dos relatos oficiais da historia do cinema.
Mulleres cineastas
Durante a conversa citou expresamente á escocesa Margaret Tait, á que sinalou como unha das creadoras fundamentais da súa formación cinematográfica e como exemplo de tantas autoras cuxa contribución artística non sempre recibiu o recoñecemento merecido.
O director explicou ademais algúns dos procesos creativos detrás de Matria, deténdose especialmente no traballo realizado xunto a María Vázquez para construír unha personaxe profundamente arraigada na realidade de moitas mulleres da costa galega.
Outro dos aspectos máis destacados foi a análise da linguaxe cinematográfica da película e do seu ritmo de montaxe, concibido para trasladar ao espectador a presión e a intensidade emocional que acompañan á protagonista ao longo da historia.
Durante a súa conversa cos responsables de Marín de Cine, o cineasta resumiu esta intención cunha frase que foi recibida con grande entusiasmo pola organización: «Invitádeme coa seguinte peli».
