Onte, 7 de xaneiro, San Xulián celebrou a súa misa principal cun templo ateigado e a presenza das autoridades locais. A procesión polas rúas, acompañada polo Grupo Carballido, mantivo viva unha tradición moi arraigada na parroquia e reuniu a veciños de todas as idades.
Mañá repetirase a cerimonia, desta volta en honra da Virxe dos Remedios, completando o apartado relixioso previo ás celebracións populares. A alcaldesa, María Ramallo, e o concelleiro Pablo Novas asistiron aos actos e agradeceron o labor da Comisión de Festas, que leva meses preparando o programa.
Programación da fin de semana
Desde o sábado a música e a animación tomarán o centro da parroquia. A xornada abrirase co pasarrúas e a sesión vermú da Charanga OT, con pulpeiro e servizo de bar para ambientar o encontro veciñal. Pola tarde, o mago Dani García ofrecerá un espectáculo para público infantil e adulto xunto a DGelati. Pola noite chegará a primeira gran verbena, co dúo La Vissión e a orquestra Players, un dos pratos fortes do cartel, que promete longo baile e repertorio para todos os gustos. A festa prolongarase ata altas horas.
Verbena, familia e peche con fogos
O domingo manterá o ritmo con nova sesión vermú, pasarrúas da Charanga Noroeste e espectáculo familiar de Fran Rei e Superheroe. Á noite actuará Os Satélites e o peche chegará coa tirada de fogos.
Con estas festas arrancan as festas do ano 2026 que axudan a manter vivas as tradicións e o espírito comunitario, o mesmo co que comeza o ano en San Xulián. Invítase á veciñanza a gozar das actividades con responsabilidade, para que a celebración transcorra con normalidade e poida seguir sendo un referente no calendario festivo de Marín.
Programación da fin de semana
Sábado, 10 de xaneiro
● 10.00h. Pasarrúas e sesión vermú a cargo da Charanga OT (haberá pulpeiro
e servizo de bar)
● 19.00h. Espectáculo de maxia de Dani García con DGelati
● 22.00h. Gran Verbena co dúo La Vissión, seguidos da Orquestra Players
Domingo, 11 de xaneiro
● Sesión vermú con pulpeiro e servizo de bar
● 15.00h. Pasarrúas a cargo da Charanga Noroeste
● 18.00h. Espectáculo familiar con Fran Rei e Superheroe
● 21.00h. Gran Verbena amenizada pola Orquestra Os Satélites
● 23.00h. Gran tirada de fogos de lucerío
