A empresa “Viñas Blancas” é a encargada de acometer as obras necesarias para corrixir os danos detectados na rampa de acceso a Portocelo e garantir a seguridade da estrutura. Os traballos estarán supervisados por un arquitecto, e contarán coa presenza dun enxeñeiro municipal e dun representante da empresa executora. Segundo informou o Concello tras a reunión técnica, o prazo estimado para completar a reparación é de dez días, polo que se agarda que a rampa volva estar operativa en breve.
Desde o consistorio explicaban que se trata dunha actuación prioritaria, xa que a rampa de madeira presentaba un importante desnivel e outras patoloxías graves. A inspección técnica realizada tras a detección do problema revelou que a estrutura sufría pudrición e rebrandecemento nos piares, xiros que alteraban a súa verticalidade, corrosión nas pezas de unión e deterioro nas varandas. Ante esta situación, procedeuse ao seu valado e peche por seguridade, para evitar riscos ás persoas usuarias.
Seguirá en uso durante o que resta da tempada estival
O obxectivo da intervención actual é restaurar a estabilidade e seguridade da rampa para que poida seguir en uso durante o que resta da tempada estival. A actuación inclúe a reparación ou substitución das partes danadas e o reforzo dos elementos estruturais máis afectados. Esta solución temporal permitirá recuperar o acceso á praia en condicións seguras para todas as persoas, especialmente aquelas con mobilidade reducida.
Con todo, o Concello xa avanzou que a reparación actual non é definitiva. A intención é que, de cara ao verán de 2026, se leve a cabo un proxecto integral de substitución da pasarela actual por unha nova estrutura. Esta nova instalación deberá cumprir todos os requisitos de seguridade e accesibilidade, consolidándose como un servizo esencial da praia.
Dende o Concello destacan a importancia de garantir a inclusión nos espazos públicos e lembran que as infraestruturas como esta rampa son fundamentais para facer das praias un lugar accesible para todas as persoas. A intervención na rampa de Portocelo forma parte do compromiso do goberno local coa mellora continua dos servizos públicos e coa seguridade dos usuarios.
