Marín centrará a conmemoración do 8 de marzo nas traballadoras do Servizo de Axuda no Fogar (SAF), un colectivo maioritariamente feminino que sostén, desde a discreción, boa parte do benestar diario da vila. Baixo o lema “SAF, os coidados que melloran vidas”, o Concello quere visibilizar unha profesión marcada pola vocación, a esixencia física e emocional e unha clara fenda de xénero: das 60 persoas que integran o servizo municipal, 59 son mulleres.
A campaña institucional foi presentada pola alcaldesa, María Ramallo, acompañada polas concelleiras Marián Sanmartín e Mónica Viqueira, así como polas representantes do Centro de Información á Muller (CIM).
Ramallo subliñou que o SAF constitúe “un dos piares silenciosos do benestar”, ao permitir que persoas maiores ou dependentes permanezan nos seus fogares, no seu entorno vital e afectivo. “É o momento de visibilizar e dignificar unha profesión básica, onde os coidados son o centro”, afirmou.
5.000 horas mensuais
O servizo, que acaba de renovar contrato como dous de maior investimento municipal, presta 5.000 horas mensuais de atención gratuíta e chega a 90 fogares.
As cifras dan conta da súa dimensión estrutural. O contexto de envellecemento progresivo da poboación galega, onde os coidados de proximidade son unha peza clave para garantir autonomía persoal e cohesión social.
A realidade laboral destas profesionais combina atención técnica e acompañamento humano. Traballan no espazo máis íntimo das persoas usuarias, con horarios fragmentados e desprazamentos continuos entre domicilios
A carga física e mental é elevada, así como a responsabilidade ética que implica intervir en situacións de dependencia. A feminización case absoluta do servizo volve poñer sobre a mesa a persistencia da división sexual do traballo. Isto supón a necesidade de recoñecer social e economicamente os coidados.
Programación 8M
A programación do 8M inclúe actividades educativas en centros de Primaria, baixo o título “Un día axudando na casa”. A iniciativa “Radar: Level Up” dirixida a alumnado de ESO e Bacharelato, co obxectivo de promover a corresponsabilidade desde idades temperás.
O acto institucional celebrarase o propio 8 de marzo ás 12:30 horas no Museo Municipal Manuel Torres, onde se lerá a declaración institucional e se proxectará un documental con testemuños reais das traballadoras Teresa Edreira, Lila Anaya Becerra e Saida Omar.
O autocoidado
Ademais, o 10 de abril desenvolverase no Centro de Saúde un obradoiro de prevención do burnout. Nesta ocasión estará destinado ás profesionais do SAF, co fin de ofrecer ferramentas de autocoidado fronte ao desgaste acumulado.
Por outra banda, a exposición fotográfica “Mans Coidadoras”, instalada no vestíbulo do Concello ata o 6 de marzo completa unha programación dirixida a dignificar o valor social do coidado profesional. Posteriormente, permanecerá no Museo Manuel Torres ata o 8 de marzo.
