No eido deportivo destaca o 5º Torneo de Petanca, organizado pola ACD Gharaboto, que se desenvolverá no Parque da Barriada Virxe do Carme durante toda a fin de semana. O sábado 5, o torneo terá lugar en horario de 09.30 a 14.00h e de 16.00 a 20.00h, mentres que o domingo 6 continuará de 09.00 a 14.00h.
A fin de semana coincide tamén coa celebración da Semana Estrela de Marín, impulsada pola asociación de comerciantes Estrela de Marín en colaboración co Concello de Marín. O venres 4 de xullo, os actos comezarán ás 18.00h con torneos de ESports no Multiusos da Praza de Abastos, continuarán co paso da Charanga Jalácticos polas rúas ás 19.00h, e culminarán cun sorteo presencial ás 20.00h, tamén no Multiusos.
Artesanía e música para o primeiro fin de semana de xullo
A artesanía tamén ten o seu espazo cunha Mostra de Artesanía na Alameda, que se inaugurará o venres 4 pola tarde e permanecerá aberta ata o 10 de xullo, ofrecendo produtos únicos feitos a man polos artesáns locais e da contorna.
Como broche de ouro á programación, o domingo 6 de xullo ás 21.00h, a Alameda acollerá o espectáculo musical “Camiñantes e Cantantes”, un evento cheo de enerxía e música galega con artistas como La Oca Band, Pili Pampín, Pepo Suevos e Laura Añón. Unha proposta pensada para gozar en familia e que promete converterse nun dos momentos máis festivos do verán marinense.
Marín conta esta primeira fin de semana do mes de xullo cunha programación diversa e para todos os gustos, cunha variada combinación de deporte, cultura, música e comercio local.
