O Bloque Nacionalista Galego (BNG) celebrará este venres 30 de xaneiro, ás 20:00 horas, no Museo Municipal Manuel Torres, o acto público “Abrir Marín ao mar, recuperar o noso”. Un xuntanza veciñal para explicar o proxecto Abrir Marín ao Mar e abrir un espazo de información e debate sobre a recuperación do litoral de Marín.
No acto intervirán Néstor Rego, deputado do BNG no Congreso, e Lucía Santos, voceira do BNG de Marín. Rego abordará o papel das institucións estatais, mentres Santos explicará a posición e as propostas do BNG para a vila.
O acto celébrase tras a aprobación no Congreso dos Deputados dunha iniciativa que insta o Goberno do Estado a iniciar o proceso de cesión dos terreos, un respaldo político previo que abre unha oportunidade para avanzar na recuperación da beiramar.
Desta forma, a iniciativa aposta por facilitar un maior acceso público á beiramar e mellorar a integración do litoral na vila, sen cuestionar os usos do porto nin da Escola Naval Militar, co obxectivo de avanzar cara a un Marín máis habitábel, sostíbel e socialmente cohesionado.
Recollida firmas
Durante este mes de xaneiro o grupo nacionalista de Marín levou a cabo diferentes actos para recoller firmas entre os veciños e veciñas como apoio á tramitación iniciada no Congreso dos Deputados. Desta forma ínstase o goberno central a dar cumprimento á proposta para a recuperación de espazos da Escola Naval Militar e do Porto para uso público.
No acto deste venres tamén se poderá participar coa firma desta proposta. Ademais desde a organización política manterán estas mesas públicas para a veciñanza en diferentes puntos de Marín aínda que esperarán que melloren as condicións meteorolóxicas.
