O Bloque Nacionalista Galego (BNG) volveu solicitar a instalación de
elementos de sombra na zona de xogos do Espazo Alcalde Blanco, atendendo a unha demanda reiterada da veciñanza. A formación nacionalista lembra que este espazo conta cun grande potencial para o desfrute das crianzas durante o verán, mais carece de áreas acondicionadas que as protexan das altas temperaturas, unha situación que pode supoñer un risco para a saúde pública.
Esta problemática xa foi trasladada polo BNG no ano 2023. No Pleno da
Corporación municipal celebrado o 13 de xullo dese ano, a concelleira
nacionalista Celia García reclamou a instalación dalgún sistema que
proporcionase sombra ás familias usuarias da zona. Naquel momento, García xa advertía de que “esta circunstancia é un detalle evidente que xa debera estar previsto no proxecto de instalación da zona de xogos acuáticos”.
Dous anos despois
Máis de dous anos despois, o concelleiro do BNG, Tino Iglesias volveu levar
esta cuestión ás institucións municipais, no pasado pleno celebrado o 18 de
xuño. Segundo explica a formación, a resposta do Goberno local do Partido
Popular (PP) foi que xa se realizaran xestións e solicitudes a varias empresas para instalar algún elemento de sombra, aínda que recoñecendo ao mesmo tempo que dificilmente estará dispoñible para este verán.
Desde o BNG consideran unha falta de respecto que, tras máis de dous anos de reclamacións públicas e propostas concretas, o PP continúe sen ofrecer unha solución efectiva para unha necesidade básica nun espazo destinado ao lecer infantil durante os meses de maior calor.
A organización nacionalista pregúntase se o Goberno local “vive nun estado de amnesia que lle impide lembrar as demandas que leva anos realizando a
veciñanza e trasladando o BNG” ou se, pola contra, considera que a cidadanía non merece explicacións serias sobre unha problemática evidente e reiteradamente denunciada.
O BNG insiste en que a instalación de zonas de sombra debe ser unha
actuación prioritaria para garantir un uso seguro e confortable deste espazo
público.
