O Concello de Marín vén de acometer recentemente unha serie de actuacións de conservación e posta en valor en distintos lavadoiros do municipio, co obxectivo de garantir a súa preservación e mellorar o seu entorno.
En concreto, realizáronse labores de selado dos vasos, así como tarefas de recuperación e limpeza nas contornas dos seguintes lavadoiros: Pontiña, no Iglesario de San Xulián; Coirados, tamén en San Xulián; Cadrelo, en Santomé; Troncosa, igualmente en Santomé; e Don Pedro, en Mogor.
Patrimonio etnográfico
Estas intervencións enmárcanse na aposta do Goberno local pola protección do patrimonio etnográfico e cultural do rural marinense. Os lavadoiros constitúen elementos de grande valor histórico e social, xa que foron durante décadas puntos de encontro veciñal e espazos fundamentais na vida cotiá das parroquias.
Co paso do tempo, moitos destes espazos sufriron un deterioro progresivo, polo que resulta imprescindible levar a cabo actuacións periódicas de mantemento que permitan conservar a súa estrutura e dignificar a súa contorna.
Neste sentido, os traballos realizados contribuíron non só a mellorar o seu estado de conservación, senón tamén a recuperar a súa imaxe como elementos singulares da paisaxe rural. Dende o Concello de Marín quérese salientar a importancia de coidar e poñer en valor o rural, entendéndoo como unha parte esencial da identidade do municipio.
