Segundo a información facilitada polo Concello de Pontevedra, a caída provocou que o mozo quedase inconsciente, posiblemente debido á forza do impacto e ao baixo caudal que presenta nestes días o río Lérez. Ao non aparecer na superficie, as persoas que se atopaban con el deron de inmediato a voz de alarma, o que activou un amplo operativo de emerxencia.
Ao lugar desprazáronse efectivos do parque de bombeiros de Pontevedra, que localizaron o menor na auga, así como sanitarios do 061, que lle practicaron manobras de reanimación no mesmo punto do rescate. Unha vez estabilizado, foi trasladado con vida ao Hospital de Montecelo, onde permanece ingresado en estado grave.
Aberta unha investigación polo acontecido
Tamén interviñeron axentes da Policía Local de Pontevedra e da Policía Nacional, encargada de abrir unha investigación para esclarecer as circunstancias exactas do ocorrido. Fontes oficiais xa descartaron a posibilidade de que se tratase dun intento de suicidio, aínda que por agora non transcendeu a razón pola que o menor decidiu saltar desde o viaduto.
O suceso xerou expectación na zona, onde varias persoas presenciaron a chegada dos equipos de emerxencia e o intenso traballo para rescatar o mozo. A ponte da Palabra, dende a que se produciu o salto, é unha infraestrutura elevada sobre o Lérez que ofrece unha gran vista da contorna, pero tamén supón un risco considerable debido á súa altura e á variabilidade do caudal do río.
O Concello de Pontevedra recorda a importancia de extremar as precaucións e evitar condutas perigosas nas inmediacións de ríos e pontes, especialmente en épocas de baixo caudal.
Ao peche desta edición, ainda non hai máis información dispoñible sobre o estado do mozo nin sobre as causas que motivaron o salto.
