A Asociación de Nais e Pais de Alumnos/as O Toural convoca unha manifestación para mañá, xoves 30 de outubro, ás 20:00 horas, baixo o lema “Non aos recortes en educación”.
A marcha partirá dende o centro escolar ata o Concello e pretende dar continuidade ás mobilizacións que esta semana están a protagonizar docentes de toda Galicia en defensa dunha educación pública de calidade.
Dous días de folga en Galicia
A convocatoria chega despois da folga do profesorado galego dos días 28 e 29 de outubro, que rexistrou un seguimento importante en numerosos centros educativos.
O principal motivo das protestas é o incremento das ratios nas aulas e a falta de recursos para atender á diversidade do alumnado, unha situación que os sindicatos docentes levan denunciando desde o inicio do curso.
Segundo as organizacións convocantes, o sistema educativo galego sofre unha deterioración progresiva derivada dos recortes orzamentarios e da escaseza de profesorado de apoio e especialistas en atención á diversidade. Aseguran que a Xunta non está a responder ás necesidades reais dos colexios e institutos, o que está a provocar unha sobrecarga de traballo e unha perda de calidade no ensino.
As familias súmanse á protesta
Desde ANPA O Toural sinalan que a súa manifestación pretende visibilizar o malestar das familias ante a falta de medios e o impacto que estas políticas teñen na aprendizaxe e no benestar do alumnado. “Non podemos quedar calados mentres se reducen apoios, se masifican as aulas e se recortan servizos básicos”, indican desde a asociación. A mobilización conta co apoio doutras ANPAS e de parte do profesorado, que anima á comunidade educativa a unirse para defender unha escola pública inclusiva, con máis profesionais e máis recursos.
