As sesións celebraranse en sábado, de 10 a 14 horas, cun prezo de 55 euros por curso e prazas limitadas. Cada obradoiro céntrase nunha temática diferente, combinando tradición e innovación, e buscando sempre fórmulas sinxelas e naturais, sen ingredientes artificiais.
O calendario comeza o 27 de setembro co «Botiquín Fermentado» de Soledad Saborido, unha proposta na que se elaborarán vinagres, kvass de remolacha, Fire Cider, fermentos en mel e oximeis. O obxectivo é preparar un auténtico botiquín de outono baseado en remedios naturais de longa tradición popular.
O poder probiótico das verduras fermentadas
En outubro, o día 11 ou o 18, será a quenda dos vexetais fermentados. Os/as participantes mergullaranse no mundo do chucrut, o kimchi e as salmouras, explorando a versatilidade da fermentación láctica de verduras e o seu poder probiótico, que fortalece a microbiota e favorece o benestar dixestivo.
O mes de novembro traerá dúas datas alternativas, o 8 ou o 22, cun curso adicado ás salsas, dips e untables. Nesa ocasión elaboraranse ketchup, mostaza, maionesa, sriracha, humus ou patés de sementes, todos eles en versión fermentada e libre de aditivos industriais. Trátase dunha proposta especialmente atractiva para quen queira enriquecer os seus menús cotiáns con alternativas saudables e cheas de sabor.
Receitas para compartir no mes de Nadal
Finalmente, o 13 de decembro celebrarase o curso «Fermenta Nadal», un obradoiro pensado para preparar receitas especiais de cara ás festas. Alí poderanse crear fermentados para compartir nas mesas festivas ou mesmo para converter en agasallos únicos e personalizados para amigos e familiares.
Con esta programación, «Fermentos da Meiga» reforza a súa aposta pola divulgación dunha tradición milenaria que hoxe revive con forza como aliada da saúde e da creatividade culinaria. Soledad Saburido busca achegar o coñecemento científico e a práctica cotiá a todo tipo de públicos, demostrando que os fermentados son accesibles, saborosos e beneficiosos.
