Estes últimos días de outubro chegan cargados de actividades para celebrar o Samaín na comarca. Propostas para todos os públicos que combinan diversión, enigma e tradición. Marín, Cangas e Pontevedra preparan unha ampla programación que converterá esta semana nun auténtico festín de meigallos e cabazas.
Obradoiro de Halloween en Marín
O centro de aprendizaxe «Activamente» organiza un Taller de Halloween pensado para nenas e nenos a partir de tres anos, nos días sen cole. Celebrarase o venres 31 de outubro e o luns 3 de novembro, en horario de 9.00 a 14.00 horas, nas súas instalacións da avenida Jaime Janer, 139.
A programación inclúe pocións máxicas, cociña terrorífica, manualidades e baile de Halloween, nun ambiente seguro e educativo. Ademais, ofrécense descontos especiais para o alumnado habitual do centro. As inscricións poden facerse directamente en Activamente ou chamando ao teléfono 679 003 126.
Enigmas e probas misteriosas en Cangas
Do 27 ao 31 de outubro, o comercio de Cangas do Morrazo será o escenario da «Xincana do Alén», unha actividade organizada por Pido Papas en colaboración co Concello de Cangas.
Trátase dunha xincana chea de enigmas ocultos e probas misteriosas que se desenvolverán polas rúas do centro durante o horario comercial. A proposta convida a veciños e visitantes a deixarse levar pola intriga e resolver os desafíos do outro mundo. A participación é aberta e pode obterse máis información a través da ligazón pidopapas.com/xincana.
Unha noite arrepiante en Pontevedra
Pontevedra recupera un dos seus eventos máis emblemáticos: «A Noite dos Calacús». Do 26 ao 31 de outubro, o Mercado de Pontevedra converterase no epicentro das celebracións de Samaín, cunha programación que inclúe actividades, animacións na cidade e a tradicional procesión das ánimas.
Dende o Concello de Pontevedra anímase a toda a cidadanía a participar nunha festa que combina o espírito ancestral galego co ambiente festivo do Halloween moderno, nunha cita xa consolidada como unha das máis esperadas do outono.
A través destas propostas, a comarca prepárase para vivir uns días cheos de fantasía, tradición e diversión, onde o medo e a imaxinación van da man para celebrar o Samaín como merece.
