O vindeiro venres, 30 de xaneiro, ás 20:00 h, terá lugar na sala do Ateneo Santa Cecilia a primeira inauguración do ano 2026 coa exposición de “Recordos” do pintor Sebastián Grande Santos. A entrada é libre e gratuíta ata completar aforo.
Na mostra, Basti Grande presenta un conxunto de obras sobre a súa vida que nacen dunha necesidade de preservar o pasado. O que comezou como un xeito de salvagardar os seus recordos revelouse como o descubrimento dun don para a pintura. A súa obra tradúcese en cadros de gran beleza, cheos de cor, paixón e un profundo significado, onde cada pincelada busca salvar do esquecemento as vivencias que nos forman.
A arte convértese no vehículo para compartir a súa historia persoal. En palabras do propio artista:
“Hai uns poucos meses, deume por pensar en… — Que vello estou — e mirei cara atrás, tantas historias…, tantos recordos…, tantas vivencias…, E pensei que todos eses arquivos e imaxes da miña vida, están a deteriorarse e vanse perder definitivamente, — Teño que facer unha copia — Pero…, como se fai unha copia da memoria? E sen ter pintado nada na miña vida, de súpeto, púxenme a pintar cadros con fotos e recordos vellos e pensei que me gustaría amosarlle a todo o mundo o meu álbum de recordos, gustaríame facer unha exposición… E aquí estamos. Grazas por vir”.
A exposición estará aberta do 30 de xaneiro ao 13 de febreiro. Poderase visitar de luns a venres, en horario de 18:00 h a 20:30 h.
