Segundo os datos facilitados polo Concello, este camiño presentaba problemas de tránsito en época de choivas debido a encharcamentos e deterioro do firme. A intervención dá continuidade a outras actuacións anteriores, como a colocación de servizos de abastecemento e saneamento executados en colaboración coa Comunidade de Montes de San Xulián.
+ Provincia
O investimento realizado forma parte do orzamento total de 335.000 euros destinado ao Plan de Pavimentación de 2025. A financiación procede do programa provincial «+ Provincia», da Deputación de Pontevedra, que permite aos concellos acometer obras de mellora en infraestruturas locais.
A visita realizada este mércores ao Camiño do Chamo contou coa participación da alcaldesa, María Ramallo, do concelleiro de Medio Rural, Pablo Novas, e de veciños da zona, que comprobaron o resultado das obras.
En curso
Ademais desta intervención, o plan municipal inclúe outras actuacións xa executadas ou en curso. Entre elas está finalizado o camiño de Viñas Blancas, mentres seguen en marcha os traballos en Currás e no acceso entre o cemiterio e o campo de fútbol de Santomé de Piñeiro. Están previstas novas obras en Mogor-Praia de Portocelo, no Cruceiro da Brea-San Blas, en Moledo e no camiño do Pazo.
O Plan de Pavimentación de Camiños Rurais execútase de maneira anual e abrangue diferentes núcleos do termo municipal. O seu obxectivo principal é mellorar o estado da rede viaria secundaria e garantir un acceso máis axeitado ás vivendas e parcelas situadas nas zonas rurais.
