Chega o Nadal e a provincia de Pontevedra énchese de luz e cor, ofrecendo un programa para vivir unha experiencia festiva única.
Co obxectivo de difundir a programación dos concellos da provincia, a Deputación de Pontevedra, a través de Turismo Rías Baixas, vén de poñer en marcha un portal onde se poden consultar todas as actividades que se realizarán por toda a provincia.
Actualmente, máis dunha vintena de concellos xa forman parte da páxina web, aínda que segue aberto o prazo para que se adhiran máis concellos.
Iluminación nas rúas e prazas, fantásticas decoracións en núcleos urbanos e rurais, concertos, mercados, atraccións, xogos, nacementos, actividades para todas as idades, etc.
A través do mapa interactivo que se pode atopar na citada web, a xente poderá buscar que ver e facer para vivir o Nadal nas Rías Baixas. Deste xeito, na páxina pódense consultar os obradoiros, concertos, mercados, festas, actuacións musicais, feiras de diversión e todas as actividades programadas tanto para maiores como para os máis pequenos da casa.
Tamén é posible descubrir outra información, como os tempos das visitas dos Reis Magos e Papá Noel aos distintos concellos, así como os días de celebración dos desfiles.
