O concurso escolar E Ti, que Pensas da Igualdade? ten como obxectivo fomentar a creatividade e o pensamento crítico do alumnado da provincia, ademais de analizar a súa percepción da situación das mulleres e dos homes na nosa sociedade.
Poesía, debuxo, música e audiovisual
Trátase de favorecer un espazo que, ademais de promover a reflexión, sirva de altofalante para a nosa mocidade e de canle de visibilización do seu talento creativo desde diferentes disciplinas, coma a poesía, o debuxo, a música e o audiovisual, arredor dun tema crucial para a nosa sociedade: a igualdade de oportunidades real e efectiva de mulleres e homes.
Búscase afondar nos novos retos aos que nos enfrontamos mediante diferentes propostas de participación, nas que a mocidade deberá contar a súa opinión e o seu sentir, e propoñerá desde a súa mirada posibles solucións aos novos desafíos presentes no día a día.
Terceira edición
Tras a boa acollida desta iniciativa, a Deputación de Pontevedra, a través do Servizo de Igualdade, acaba de poñer en marcha a terceira edición do concurso E Ti, que Pensas da Igualdade?, dirixido ás nenas, nenos, mozas e mozos da provincia de Pontevedra, coa intención de que poidan amosarlle ao mundo, mediante diversas disciplinas artísticas, cal é a súa visión sobre a igualdade de oportunidades de mulleres e homes na nosa provincia.
