O Auditorio de Marín estreará unha nova semana de actividade onde o deporte terá a súa gran festa e na que se representarán as primeiras obras de teatro desde a apertura da nova infraestrutura cultural.
A primeira cita será co deporte do municipio. O Concello retoma a celebración da Gala do Deporte despois de varios anos de parón para celebrar os espectaculares éxitos deportivos dos nosos deportistas. Presentada por Terio Carrera, a gala contará coa actuación de SonsGalia para amenizar a entrega de 14 premios aos e ás mellores da tempada, así como premios de carácter social e unha mención especial.
A entrada será gratuíta ata completar o aforo, tendo en conta a reserva de espazos para os propios premiados e os seus seres queridos e a apertura de portas será media hora antes, a partir das 19.00h.
Moliére e Marionetas
«Tartufo» de Moliére, co Grupo de Teatro do Campus de Pontevedra
Sábado, 20 de xuño, ás 21.00 horas. A gran obra de Moliére, dramaturgo francés do século XVII e considerado un dos mellores escritores da súa época, será interpretada polo elenco do Grupo de Teatro do Campus de Pontevedra.
A comedia satírica conta a historia de Tartufo, un falso devoto que se infiltra na casa dun Orgón, un home adinerado, para manipulalo e roubarse os seus bens, destrozando á súa familia. A entrada é libre e gratuíta ata completar aforo. Apertura de portas ás 20.30h.
«Sobremesa», de Teatro das Maniotas (IES de Brión), o domingo, 21 de xuño, ás 20.30h. O Grupo de Teatro do IES de Brión leva anos traballando con obras propias que non deixan indiferente. Chegan o domingo a Marín coa súa proposta “Sobremesa”, un texto orixinal e en galego sobre a familia, as festas e as relacións en xeral. A entrada é libre e gratuíta ata completar aforo. Apertura de portas ás 20.00h.
