O curso desenvolverase cunha duración total de dez horas lectivas e combinará modalidade presencial e en liña. As sesións celebraranse entre as 17.00 e as 19.00 horas, permitindo ao alumnado seguir os contidos tanto en directo como en diferido.
A coordinación da actividade recae en Rafael Cotelo Pazos, responsable do Departamento de Extensión Universitaria e Actividades Culturais da UNED en Pontevedra. A docencia estará a cargo de Lorena Cochón, xornalista, docente e axente de igualdade cunha traxectoria profesional de máis de dúas décadas centrada na divulgación social e na sensibilización arredor da igualdade e doutras cuestións sociais.
Reflexionar sobre o idadeísmo e o envellecemento activo
A iniciativa pretende abordar o concepto de idadeísmo, entendido como o conxunto de estereotipos, actitudes e prácticas discriminatorias baseadas na idade. O programa analizará as súas diferentes manifestacións —institucionais, sociais e persoais— e o seu impacto en ámbitos como a saúde, o emprego ou a percepción que as persoas teñen de si mesmas ao envellecer.
Entre os obxectivos da formación figuran tamén promover unha visión máis positiva do envellecemento, fomentar o concepto de envellecemento activo e ofrecer ferramentas que favorezan o benestar emocional e a saúde afectivo-sexual ao longo de toda a vida.
Sexualidade, saúde e comunicación na madurez
O programa estrutúrase en cinco sesións temáticas. A primeira centrarase na análise do idadeísmo e nas súas consecuencias sociais. A segunda abordará estratexias para avanzar cara a unha sociedade máis inclusiva, facendo fincapé na educación, na sensibilización social e no uso dunha linguaxe libre de prexuízos relacionados coa idade.
A terceira sesión estará dedicada á sexualidade na terceira idade, coa intención de cuestionar a idea da chamada “velles asexual” e de explicar as diferenzas entre sensualidade e erotismo. As dúas últimas xornadas analizarán a vida íntima en presenza de determinadas patoloxías frecuentes —como enfermidades cardiovasculares, artrose ou cancro— e tratarán cuestións vinculadas á prevención e á saúde sexual, incluíndo as infeccións de transmisión sexual e a importancia da comunicación na parella.
Aberto a alumnado e público interesado
O curso está dirixido tanto a estudantes como a profesionais e persoas interesadas en profundar no coñecemento do idadeísmo, a igualdade e a saúde afectivo-sexual. Tamén se abordarán cuestións relacionadas coa prevención da violencia de xénero e coa promoción do benestar emocional, especialmente no caso das mulleres.
Con esta actividade formativa, a UNED de Pontevedra busca contribuír ao debate social arredor do envellecemento e promover unha visión máis inclusiva e informada sobre a sexualidade e as relacións afectivas na etapa madura.
