O pleno municipal de Marín someteu a debateu o pasado xoves 14 de agosto, unha moción presentada polo Bloque Nacionalista Galego (BNG) na que se propón a realización dun estudo técnico para valorar a posta en marcha de áreas recreativas específicas para cans no municipio.
A iniciativa chega acompañada de 1.504 sinaturas de apoio recollidas entre a veciñanza, segundo indicou a formación, que considera que existe unha demanda social crecente para dispor de espazos seguros e adaptados ao lecer das mascotas.
Creación dun parque canino nos terreos do INVIED
O BNG xa levara unha proposta semellante ao pleno en xuño de 2022, na que solicitaba a creación dun parque canino nos terreos do Instituto de Vivenda, Infraestrutura e Equipamento da Defensa (INVIED), situados xunto ao río Lameira. Segundo lembra a formación, trátase dunha zona utilizada habitualmente para o paseo de cans. Porén, consideran que a falta de avances por parte do goberno municipal, encabezado polo Partido Popular, fai necesaria unha nova iniciativa dous anos despois.
A proposta actual inclúe a realización dun estudo técnico que permita determinar a viabilidade e a localización idónea de varias áreas recreativas. O obxectivo, segundo o BNG, é mellorar a convivencia cidadá e favorecer a integración dos animais de compañía nos espazos públicos.
A portavoz municipal do BNG, Lucía Santos, sinalou que «a creación destes espazos permitirá que os cans poidan estar soltos, xogar e socializar con outros animais sen risco de sancións por incumprir a normativa vixente». Ademais, engadiu que se «reducirán posibles problemas de seguridade derivados do uso compartido doutros espazos públicos».
Aumento significativo de cans nas familias
Segundo datos manexados pola formación, o número de persoas con animais de compañía aumentou de forma significativa nas últimas décadas, o que, ao seu xuízo, obriga ás administracións locais a adaptar as súas infraestruturas e servizos. Entre as medidas propostas, as áreas recreativas caninas son unha das fórmulas para atender esta nova realidade social.
O BNG insiste en que a posta en marcha destas áreas recreativas supón “un paso adiante” para que Marín sexa un concello máis inclusivo e amigable coas familias que conviven con animais de compañía.
