A cita desenvolverase en horario de mañá, entre as dez e a unha, e está aberta a nenos e nenas de 3 a 12 anos. Para garantir a súa praza, as familias poden inscribir previamente aos cativos a través do correo ponteaconducir@gmail.com. Con todo, se quedasen ocos, tamén se permitirá apuntarse directamente no lugar o mesmo día.
Os organizadores prepararon un circuíto que permitirá poñerse no papel de peón, ciclista ou condutor de kart, co obxectivo de experimentar situacións cotiás e interiorizar normas básicas de seguridade. Xunto a iso, haberá un concurso de debuxo no que os rapaces poderán expresar como entenden a mobilidade segura.
Corpos e servizos de seguridade
A programación ampliarase coa presenza de diferentes corpos e servizos, que achegarán os seus vehículos e medios: a Policía Local, a Garda Civil de Tráfico, a BRILAT, Cruz Vermella, Protección Civil e tamén a Policía Nacional. A exposición permitirá que os nenos coñezan de preto o traballo destes profesionais e mesmo interactúen con eles.
Outro dos atractivos será o obradoiro de mantemento de bicicletas, pensado para que os pequenos aprendan nocións básicas de coidado do seu medio de transporte. Ademais, dirixiranse charlas ás familias para reforzar a importancia de dar exemplo e transmitir bos hábitos.
Con vehículo propio e casco
Desde a organización lembran que cada participante debe acudir co seu propio medio de transporte —bicicleta, triciclo ou pequena moto— e tamén cun casco, requisito imprescindible para acceder ao circuíto. Aqueles que prefiran non empregar vehículo poderán participar igualmente como peóns. En todos os casos, será necesaria a compañía dunha persoa adulta.
Con esta iniciativa, «Ponte a Conducir» busca sensibilizar desde idades temperás sobre a responsabilidade que implica moverse con seguridade, tanto nas rúas como nas estradas. A aprendizaxe en clave lúdica, din, é unha das mellores maneiras de sementar unha cultura viaria que acompañará aos nenos no futuro.
