O Concello de Marín vén de anunciar a posta en marcha dunha nova edición das Escolas Deportivas Municipais, que este ano ofertarán un total de 21 disciplinas ao longo do curso académico, co obxectivo de fomentar a práctica deportiva entre a mocidade e consolidar a colaboración co tecido asociativo e os clubs locais.
A presentación oficial terá lugar o venres 5 de setembro, ás 16.30 horas, nun acto público que se celebrará de maneira conxunta na Alameda e no Parque Eguren polo concelleiro de Deporte, Antonio Trabaja. Durante o evento daranse a coñecer todos os detalles da programación e facilitaranse os impresos de inscrición ás persoas interesadas.
Disciplina e lugares de desenrolo
As disciplinas desenrólanse en diversos lugares de Marín e están organizadas por clubes da cidade. Estas disciplinas son as seguintes:
| Disciplina | Club | Lugar |
| Paddle Surf | Imua Paddle Surf Club Aguete | Playa de Aguete |
| Fútbol sala | Marín Futsal Club Deportivo La Peña | Pavillóns do Sequelo, Cañota, Illa de Tambo e San Narciso |
| Atletismo | Club San Miguel | Estadio Municipal de San Pedro |
| Taekwondo | Club Mats Taekwondo | Rúa Inferniño, 10 |
| Triatlón | Club Deportivo Pinarium | Escola Naval Militar Piscina Municipal |
| Voleibol | Club Deportivo SEI San Narciso | Pavillón Colexio San Narciso |
| Baloncesto | Club Baloncesto PeixeFresco Marín | Pavillón da Raña |
| Ximnasia rítmica | Club Rítmica Inmare | IES Mestre Landín |
| Remo | Club de Remo Ría de Marín | Porto de Marín |
| Kickboxing | Asociación de Boxeo de Pontevedra | CEIP Carballal |
| Ximnasia acrobática | Club Ximnasia Vila de Marín | Pavillón do Colexio San Narciso |
| Natación | Soom Management | Piscina municipal |
| Vela | Real Club Mar de Aguete | Porto de Aguete |
| Judo | Club Dom+ Judo Marín | Pavillón da Raña |
| Fútbol | Escuelas de Fútbol Villa de Marín | Estadio Municipal de San Pedro |
| Tenis | Club de Tenis Marín | Pavillón da Laxe |
| Boxeo olímpico | Team Thunder | Pavillón da Raña |
| BTT | Clube XSM | Chan de Gagán |
| Piragüismo | Club Piragüismo Tambo | Porto de Marín |
| Pilates | Gestión de instalaciones | Pavillón Colexio San Narciso |
| Salvamento | Club SAPO Pontevedra | Piscina municipal |
Programación
A programación incluirá disciplinas de carácter moi variado, desde deportes de equipo como fútbol, fútbol sala, baloncesto ou voleibol, ata modalidades individuais como atletismo, tenis, ximnasia rítmica, natación ou piragüismo, sen esquecer as artes marciais e deportes de contacto (taekwondo, judo, kickboxing, boxeo olímpico), así como actividades vinculadas ao mar como vela, remo e paddle surf.
As sesións desenvolveranse en diferentes espazos municipais e instalacións deportivas da vila, tales como o Estadio Municipal de San Pedro, a Piscina Municipal, o Pavillón da Raña ou o Porto de Marín, contando coa colaboración de clubs e entidades que xogan un papel fundamental na dinamización da oferta.
Custo de inscrición
O custo da inscrición mantense en 55 euros por participante para todo o curso, que se prolongará entre o 1 de outubro e o 31 de maio. O pagamento deberá realizarse directamente ante o club ou entidade organizadora, segundo os procedementos establecidos por cada unha delas.
O prazo de inscrición abrirase o 8 de setembro e permanecerá dispoñible ata o 19 do mesmo mes. Os formularios estarán accesibles no acto de presentación, nas propias entidades deportivas e tamén a través da páxina web do Concello de Marín.
