Nun claro acto de compromiso coa erradicación da violencia de xénero, o Bloque Nacionalista Galego (BNG) insta de maneira contundente á Xunta de Galicia a intensificar os seus esforzos económicos e preventivos na loita contra esta lacra social.
Durante o último pleno municipal celebrado o 9 de novembro, a concelleira do BNG, Celia García, presentou as seguintes propostas destinadas a fortalecer a resposta institucional ante a violencia de xénero, unha prioridade política, social e institucional de primeira orde que require un compromiso colectivo para establecer novos compromisos.
Incremento de recursos económicos destinados especificamente á loita contra a violencia de xénero. A proposta suxire que estes recursos non deberían ser inferiores ao 1% do orzamento total para o ano 2024.
Maior esforzo en prevención conscientes de que é clave na erradicación da violencia sexual, recoñecendo a responsabilidade compartida tanto das institucións como da sociedade no seu conxunto.
Ampliación e extensión dos Centros de Información á Muller (CIM) considerados elementos esenciais para brindar apoio e asistencia ás vítimas de violencia de xénero.
A pesar da importancia da moción presentada polo BNG en liña coa concienciación necesaria sobre a violencia de xénero, o debate desviouse cara a unha vía partidista, especialmente por parte do Partido Popular (PP), o que derivou en tensión debido ás apreciacións doutros partidos sobre os
comportamentos e actitudes da dereita neste asunto.
Tras un debate reflexivo sobre a moción, alcanzouse un acordo unánime entre os grupos da corporación, expresando a vontade do Concello na loita contra a violencia machista.
Nun contexto no que a violencia de xénero segue a ser unha realidade persistente, o BNG fai un chamado á unidade de todas as forzas políticas para abordar esta cuestión de maneira integral, rexeitando calquera forma de discriminación ou banalización da violencia de xénero.
