A docencia non se limita á explicación teórica: o groso do programa céntrase en sesións prácticas nas que o alumnado aplica o aprendido na aula baixo a supervisión do profesorado.
Os obradoiros fan especial fincapé no Soporte Vital Básico (SVB), abordando a valoración da consciencia, a comprobación da respiración mediante a manobra fronte-mantón e a técnica VOS, a Posición Lateral de Seguridade (PLS), as manobras de Reanimación Cardiopulmonar (RCP) e o uso do desfibrilador semiautomático (DEA) con equipos de adestramento.
Segundo explica Eva Álvarez Yáñez, docente de FOL e coordinadora destas formacións, “a parte práctica é fundamental. É aquí onde realmente interiorizan o que hai que facer e gañan confianza para actuar”.
Maniobra de Heimlich e atención a atragantamentos
Outra das prácticas centrais é a aprendizaxe da Maniobra de Heimlich en casos de atragantamento total ou obstrución grave das vías aéreas. Para iso emprégase material específico que permite simular a situación con seguridade. “É unha das situacións máis habituais fóra do ámbito sanitario e o alumnado valórao moito porque sente que pode ser útil na vida real”, sinala Álvarez Yáñez.
Os obxectivos inclúen identificar emerxencias, aplicar o protocolo PAS, coñecer o deber legal de socorro, realizar a secuencia do SVB, actuar ante atragantamentos, xestionar o estrés e garantir a autoprotección. Tamén se traballa a empatía e o acompañamento á vítima.
“Non se trata só de aprender manobras”, indica a docente, “senón de manter a calma, saber pedir axuda e transmitir tranquilidade á persoa que sofre a emerxencia”.
O impacto positivo no alumnado
A participación é activa en todas as sesións e o feedback é moi positivo. O alumnado recoñece que é unha formación moi necesaria e que a práctica facilita lembrar os pasos de actuación. “Din que facendo o obradoiro lles queda gravado o protocolo e que agora se ven capaces de intervir se é preciso”, comenta Álvarez Yáñez.
A implicación do profesorado neste curso
Neste curso académico destacouse especialmente a formación en primeiros auxilios ao profesorado, impartida no mes de novembro por persoal de emerxencias sanitarias e medicina. Parte do claustro recibiu a capacitación por primeira vez e outra parte participou en accións de reciclaxe e actualización. “É clave que o profesorado tamén estea preparado, porque pode ser o primeiro en actuar dentro do centro”, subliña.
Extensión a outros niveis educativos dende o curriculum
O alumnado de ESO e Bacharelato tamén recibiu formación introdutoria, a través do departamento de Educación Física, ampliando o alcance dun programa que xa se consolidou como sinal de identidade do IES Chan do Monte.
