Nos últimos meses, a protectora «Os palleiros» tivo que atender a un número importante de cans con enfermidades graves ou problemas de saúde que requiriron intervención veterinaria. Estes gastos incrementaron de maneira notable as débedas coas clínicas que colaboran coa asociación, sempre priorizando o benestar dos animais.
Ademais, a protectora está a xestionar un contratempo administrativo cunha das súas contas bancarias no BBVA, o que dificultou o cobro regular das cotas de socios. Trátase dun inconveniente que, segundo explican, xa están tentando resolver, pero que deixou á entidade con menos liquidez da habitual.
Teñen abertas varias vías de colaboración
Para afrontar este escenario, «Os Palleiros» mantén abertas varias vías de colaboración. Alén das achegas económicas directas, continúan en marcha iniciativas solidarias como a venda da súa liña de roupa, con camisetas e sudadeiras a prezos accesibles, cuxos beneficios se destinan integramente ao coidado dos cans. Tamén teñen dispoñible a súa lotaría de Nadal, este ano en décimos, que inclúe un donativo de dous euros para o mantemento do refuxio así como donacións de materiais que fai algunha xente ao refuxio e que venden ás veces no seu posto nalgunhas festas ou feiras.
Cada pequena achega, unha axuda real
Desde a asociación destacan que, a pesar das dificultades, seguen adiante con ilusión e confianza na solidariedade cidadá. Lembran que cada pequena achega, tanto económica como en forma de voluntariado, supón unha axuda real para manter cubertas as necesidades básicas dos animais: alimentación, medicamentos, atención veterinaria e instalacións dignas.
O obxectivo de «Os Palleiros» segue sendo o mesmo que que os moven no día do seu nacemento: dar unha segunda oportunidade a cans e gatos que, sen este apoio, terían un futuro incerto. Co respaldo da sociedade, esperan poder continuar desenvolvendo unha labor que non só salva vidas, senón que tamén sensibiliza sobre a importancia de tratar con respecto e responsabilidade aos animais.
Como botar unha man?
As persoas interesadas en colaborar poden facelo de diferentes xeitos: ingresando a súa achega nas contas ES09 2080 5406 8230 4013 2779 (ABANCA) ou ES52 0182 5150 8302 0173 2323 (BBVA), enviando un Bizum co código 08470, ou poñéndose en contacto directamente coa protectora a través das súas redes sociais e canles habituais.
Cada doazón, por pequena que sexa, convértese nun sopro de aire para continuar coidando daqueles que non teñen voz pero si dereito a unha vida digna.
*Todas as fotos da reportexa son das RRSS de «Os palleiros»
