A programación aposta por poñer en valor o patrimonio artístico e a convivencia veciñal, nun tempo de encontro e participación que reforza o tecido social e cultural do municipio.
Homenaxe a Manuel Torres
Este venres 24 de outubro, o Museo Manuel Torres acollerá un acto especial para conmemorar o trinta aniversario do falecemento do pintor marinense. O evento, titulado O legado artístico e cultural de Manuel Torres, contará coa participación de dous nomes destacados da cultura galega: Antón Castro e Antón Sobral, que afondarán na importancia e na vixencia da súa obra.
A presentación correrá a cargo de Ángel García Carragal, nun acto organizado polo Club de Opinión Portocelo coa colaboración do Concello de Marín. O encontro, que comezará ás 20.00 horas, será un espazo de lembranza e reflexión sobre o valor patrimonial e simbólico de Manuel Torres na identidade cultural da vila.
Tempada de magostos
O outono trae consigo o arrecendo das castañas asadas e o espírito de convivencia que caracteriza os magostos. Este sábado 25 de outubro celebrarase o magosto da Asociación de Veciños do Campo, a partir das 17.00 horas na Casa da Cultura.
O domingo 26 será a quenda da Asociación de Veciños de Santomé de Piñeiro, tamén na Casa da Cultura e á mesma hora. Ambas celebracións forman parte da Tempada de Magostos organizada polas asociacións veciñais das distintas parroquias de Marín, que se prolongará ata o mes de novembro con citas en Mogor, San Xulián, Seixo e Ardán.
Estas festas ofrecen unha ocasión perfecta para xuntarse arredor do lume e das castañas, nun ambiente familiar e festivo que combina música, gastronomía e tradición galega.
Quedada artística no Lago de Castiñeiras
Tamén o domingo 26 de outubro, o grupo Urban Sketchers Pontevedra , que promove encontros para debuxar en grupo tanto en interiores como ao aire libre, organiza unha nova quedada aberta a todas as persoas afeccionadas ao debuxo. A cita será no Lago de Castiñeiras, de 11.00 a 13.00 horas, onde os participantes poderán pintar e compartir a súa arte en plena natureza.
Un outono para celebrar
Entre a arte, a memoria e o sabor, Marín propón unha fin de semana que resume o mellor do seu carácter: o compromiso coa cultura local, o orgullo polo seu legado artístico e a alegría compartida das festas populares. Un xeito de ser que se vive e se celebra en cada recuncho da vila.
